८ मंसिर, काठमाडौं । नेकपा एमालेका अध्यक्ष केपी शर्मा ओली पहिलोपटक दार्चुला सदरमुकाम खलंगा पुगेर यसपटक चुनावी अभियानको उद्घाटन गरेका थिए । प्रचार अभियान खलंगाबाटै सुरु गर्नुको पछाडि नेपालको नयाँ नक्सालाई चुनावी एजेण्डा बनाएको तथ्य ओलीले लुकाएका थिएनन् ।
१८ कात्तिकको खलंगा सभामा गरेको २० मिनेट लामो सम्बोधनमा लगभग पुरै अवधि नेपालको भूमि आफू बाहेक अरुले फिर्ता गराउन नसक्ने बताएका थिए । दार्चुला पछि बैतडी र कञ्चनपुरको सभा पनि त्यसैदिन सम्बोधन गरेका ओलीले राष्ट्रियताको एजेण्डालाई मुख्य एजेण्डा बनाएका थिए ।
तर यी तीन वटै जिल्लामा एमालेले जित्न सकेन । दार्चुलामा त ओलीले नेपालको भूमि फिर्ता ल्याउनेसहित जिल्लाको विकास आफ्नो जिम्मा भएको बताएका थिए । ‘यहाँको मुख्य समस्या नदी नियन्त्रणको तटबन्ध निर्माण गर्नु हो । म ग्यारेन्टीका साथ भन्छु । तटबन्ध एमालेले बनाउँछ,’ ओलीले भनेका थिए, ‘महाकाली नदीले दार्चुला र खलंगा बजार भत्काउन र बगाउन पाउने छैन । त्यसको ग्यारेन्टी एमालेले गर्छ म गर्छु ।’
१८ कात्तिकमा दार्चुलामा आयोजित चुनावी सभालाई सम्बोधन गर्दै केपी शर्मा ओली/फाइल तस्वीर
ओलीले प्रधनमन्त्री शेरबहादुर देउवालाई सुदूरपश्चिमको विकासमा केही गर्न नसक्ने र भूमि फिर्ता ल्याउन नसक्ने नेता भनेर आरोप लगाए । ओलीको चेतावनी लगत्तै नेकपा माओवादी केन्द्रका अध्यक्ष पुष्पकमल दाहाल प्रचण्डलाई साथमा लिएर प्रधानमन्त्री देउवा दार्चुला पुगे । देउवाले सार्वजनिक मञ्चबाट नेपालको नक्सा प्रकाशित गर्ने भूमिका तत्कालीन नेकपाका नेताहरु प्रचण्ड र माधव नेपालले गरेको मात्रै बताएनन्, प्रतिनिधिसभा विघटन समेत सम्झिए ।
पालैपालो भएको सभाबाट नेताहरुले आ–आफ्नो उम्मेदवार जिताएर पठाउन जनतासँग आग्रह गरेका थिए । तर दार्चुलाको अन्तिम मतपरिणाम अनुसार, भने कांग्रेसका दिलेन्द्रप्रसाद बडूले जितेका छन् ।
बडूले २८ हजार ५१५ मत ल्याएर जित्दा एमालेका गणेशसिंह ठगुन्ना २६ हजार ३९१ मत ल्याएर निकटतम प्रतिद्वन्द्वी रहे । बडूको यो जित अघिल्लो चुनावको बदला मात्रै नभएर स्थानीय चुनावको नतिजा उल्टिनु समेत हो ।
गत ३० वैशाखमा सम्पन्न चुनावमा बडूले जित्न सजिलो थिएन । सत्तारुढ दलहरुबीच गठबन्धन हुँदा पनि एमालेले एउटै पनि पालिका प्रमुख जित्न सकेको थिएन । ९ मध्ये एमालेले ५ र माओवादी केन्द्रले ४ पालिका प्रमुख जितेको थियो ।
वडाध्यक्षका उम्मेदवारले पाएको मतका आधारमा पनि बडूलाई जित सजिलो थिएन । एमालेले २९ हजार ३९७ मत पाउँदा कांग्रेसको २१ हजार ५५४ र माओवादी केन्द्रको ७ हजार ८८१ मत थियो । दार्चुलाको संसदीय इतिहासले पनि बडूका निम्ति अनुकूल होइन ।
२०४८ देखि चुनाव लड्दै आएका बडूले तीन पटक हारिसकेका थिए । ०४८ र ०५६ बाहेकका चुनाव बडुले जित्न सकेका थिएनन् । २०५१ मा एमालेका प्रेमसिंह धामी, २०६४ मा माओवादीका लक्ष्मणदत्त जोशी र २०७० मा एमालेका गणेशसिंह ठगुन्नासँग पराजित बडू २०७४ मा समानुपातिकमा बसेका थिए । तर ठगुन्नाका निम्ति भने दार्चुला तुलनात्मक सहज थियो ।
०६४ मा पराजित भए बडू २०७० र २०७४ को चुनाव जितेका थिए । उनी ओली नेतृत्वको तत्कालिन सरकारमा मन्त्री भए । साभार-www.onlinekhabar.com
