कालीकोट — कर्णाली नदीमा स्काईभेटर पल्टिँदा एक जना बेपत्ता भएका छन् । कालीकोटको पचालझरना–८ चाटेबगरबाट वडा नं ४ को जारकोटस्थित कर्णाली नदीमा स्काइभेटर तार्ने क्रममा शुक्रबार बेलुका स्काइभेटर पल्टिँदा स्काइभेटर सहित सहचालक नदीमा बेपत्ता भएका हुन् ।
पचालझरना गाँउपालिका–८ चाटेबगरदेखि पचालझरना-४ जारकोट जाने क्रममा कर्णाली नदीमा पल्टिएपछि थियो । स्काइभेटर सहित एक जना बेपत्ता भएको र स्काइभेटर चालक नदीमा तैरिरहेको अवस्थामा प्रहरी र स्थानीयले उद्धार गरेको जिल्ला प्रहरी कार्यालय कालीकोटले जानकारी दिएकाे छ ।
कालीकोट खाँडाचक्र नगरपालिका –८ का स्काइभेटर चालकको सकुशल उद्धार गरिएको र एक जना बेपत्ता भएको खबर आएको जिल्ला प्रहरी कार्यालय कालीकोटका सूचना अधिकारी गोविन्द चौधरीले बताए ।
उनले भने, ‘चालकको सकुशल उद्धार गरिएको छ । सहचालक र स्काइभेटर अहिलेसम्म फेला पर्न सकेको छैन ।’ बेपत्ता सहचालकको नाम र ठेगाना खुल्न नसकेको प्रहरीले खोजीकार्य जारी राखेको जिल्ला प्रहरी कार्यालय कालीकोटले जनाएको छ ।
