देवराज रेग्मीको पुस्तक “अनुभव, अनुभूति र संघर्षको सँगालो” विमोचन

बझाङ – देवराज रेग्मी द्वारा लिखित पुस्तक “अनुभव, अनुभूति र संघर्षको सँगालो” सहिद दिवसको अवसर पारेर औपचारिक रूपमा विमोचन गरिएको छ। सहिद दिवसको स्मरणमा आयोजित विशेष कार्यक्रममा पुस्तकको लोकार्पण गरिएको हो।
कार्यक्रमका प्रमुख अतिथि पूर्वमन्त्री भानुभक्त जोशीले पुस्तक विमोचन गर्दै लेखक देवराज रेग्मीको जीवन यात्रा, राजनीतिक संघर्ष र वैचारिक प्रतिबद्धताको प्रशंसा गर्नुभयो। उहाँले पुस्तकले  कम्युनिस्ट आन्दोलनको इतिहास, त्याग र संघर्षलाई दस्तावेजीकरण गर्न महत्वपूर्ण भूमिका खेल्ने विश्वास व्यक्त गर्नुभयो।
विमोचन कार्यक्रममा बझाङ जिल्लाका विभिन्न राजनीतिक दलका नेताहरू, बुद्धिजीवी, साहित्यप्रेमी, पत्रकार तथा स्थानीय जनप्रतिनिधिहरूको उल्लेखनीय उपस्थिति रहेको थियो। सहभागीहरूले पुस्तकले स्थानीय राजनीतिक इतिहास र क्रान्तिकारी आन्दोलनका अनुभवहरूलाई भावनात्मक र यथार्थपरक रूपमा प्रस्तुत गरेको प्रतिक्रिया दिएका थिए।
पुस्तक “अनुभव, अनुभूति र संघर्षको सँगालो” लेखक देवराज रेग्मीको व्यक्तिगत जीवनका अनुभव, भावनात्मक अनुभूति तथा लामो राजनीतिक तथा क्रान्तिकारी संघर्षका कथा समेटिएको संग्रह हो। पुस्तकमा बझाङ लगायत सुदूरपश्चिम क्षेत्रका कम्युनिस्ट आन्दोलनका विभिन्न पक्षहरू, संगठन निर्माण, जनआन्दोलन, सामाजिक परिवर्तनका प्रयास तथा राजनीतिक यात्राका उतार–चढावहरूलाई उजागर गरिएको छ।
लेखक रेग्मीले पुस्तक विमोचन कार्यक्रममा आफ्नो संघर्षपूर्ण जीवन यात्रालाई स्मरण गर्दै सहिदहरूको त्यागले नै आजको राजनीतिक चेतना र परिवर्तन सम्भव भएको बताउनुभयो। उहाँले नयाँ पुस्तालाई राजनीतिक चेतना, सामाजिक न्याय र परिवर्तनका लागि प्रेरणा दिने उद्देश्यले पुस्तक लेखिएको जानकारी दिनुभयो।
कार्यक्रम सहिदहरूप्रति श्रद्धाञ्जली अर्पण गर्दै, राजनीतिक परिवर्तनमा उनीहरूको योगदानको चर्चा गर्दै सम्पन्न गरिएको थियो।

• संसद विघटन