बझाङमा वन बिरालाले १५६ कालिज मार्दा किसानलाई लाखौंको क्षति

सेतीकर्णाली खबर 

 दोरेन्द्र खड्का ४ भाद्र बझाङ – बझाङको छबिस पाथिभेरा गाउँपालिका–२ मुम्लामा एक किसानको कालिज पालन व्यवसायमा वन बिरालोको आक्रमणले ठूलो क्षति पुगेको छ।

गाउँपालिकाका विकास एडीले पाल्दै आएका १५६ वटा कालिजलाई हिजो राति करिब १ बजे खोरमा पसेको वन बिरालोले मारिदिएको हो। यस घटनामा किसान एडीलाई लाखौं रुपैयाँ बराबरको क्षति भएको छ।

लामो समयदेखि मेहनत गरेर कालिज पालन व्यवसायमा संलग्न एडीले बजारमा बेचेर पारिवारिक आर्थिक अवस्था सुधार्ने तथा युवालाई व्यवसायिक कृषितर्फ आकर्षित गर्ने योजना बनाएका थिए। तर, एकै रातमा भएको यस घटनाले उनको सपना ध्वस्त भएको छ।

किसान विकास एडीले भने, “मैले ठूलो आशा राखेर यो व्यवसाय थालेको थिएँ। अहिले एकै रातमा सबै नष्ट भयो। सरकारले क्षतिपूर्ति वा राहत दिने आशा गरेको छु।”

यो घटनाले स्थानीय समुदायमा गहिरो दुःख र आक्रोश सिर्जना गरेको छ। स्थानीयहरूले यस्ता जनावरहरूको आक्रमणबाट जोगिन सरकारी निकायले उचित सुरक्षा उपाय अपनाउनुपर्ने माग गरेका छन्।

कृषि विज्ञहरूले यस्ता घटनाले किसानहरूको आत्मविश्वासमा नकारात्मक असर पार्ने चेतावनी दिएका छन्। उनीहरूले किसानहरूको सुरक्षाका लागि दीर्घकालीन योजना बनाउन सरकारलाई आग्रह गरेका छन्।

त्यस्तै, स्थानीय प्रशासन र वन विभागलाई घटनाप्रति तत्काल ध्यान दिन, क्षतिग्रस्त किसानलाई राहत उपलब्ध गराउन र भविष्यमा यस्ता आक्रमण रोक्न सुरक्षात्मक उपाय (जस्तै बाटो बन्ध, फेन्सिङ, राति पहरा) लागू गर्नुपर्ने सुझाव पनि स्थानीयहरूले दिएका छन्।

• संसद विघटन