राष्ट्रिय स्वतन्त्र पार्टी ले मंसिर ८ गतेदेखि दोस्रो चरणको आन्दोलन सुरु गर्ने घोषणा गरेको छ।

काठमाडौँ : राष्ट्रिय स्वतन्त्र पार्टी (रास्वपा) ले मंसिर ८ गतेदेखि दोस्रो चरणको आन्दोलनको कार्यक्रम घोषणा गरेको छ।

आइतवार वनस्थलीस्थित घण्टीघरमा पत्रकार सम्मेलन गरी रास्वपाका नेताहरूले पार्टी सभापति रवि लामिछानेलाई हिरासत बाहिरै राखेर अनुसन्धान गर्नुपर्ने दबावसहितको दोस्रो चरणको आन्दोलनको कार्यक्रम घोषणा गरेको हो।

हिरासतभित्रै राखेर अनुसन्धान गर्ने कानुनी व्यवस्था हटाउनुपर्ने, विगत दुई दशकयताका उच्च ओहदाका भ्रष्टाचारीहरूको न्यायिक छानबिनका लागि सर्वोच्च अदालतका पूर्वन्यायाधीशको अध्यक्षतामा न्यायिक छानबिन समिति गठन गरी दोषीमाथि कारबाही गर्नुपर्ने सरकारसँग माग गर्दै दोस्रो चरणको आन्दोलनका कार्यक्रम घोषणा गरिएको पार्टीका प्रवक्ता मनीष झाले जानकारी दिए।

झाले भने, ‘भविष्यमा कानुनी प्रावधान दुरुपयोग गरी बदनियतपूर्ण प्रतिशोध कुनै नागरिकविरुद्ध पनि नहोस् भनी विद्यमान फौजदारी कानुन तथा संरचनागत प्रणाली सुधार र परिमार्जन गर्न हामी ध्यानाकर्षण गराउँछौँ।’

यसैगरी बैठकले जोखिममा परेका सहकारी संस्थाहरूबाट बचतकर्ताको रकम फिर्ता गराउने प्रक्रिया अविलम्ब शुरु गर्न पनि माग गरेको छ। अधिकार सम्पन्न स्वायत्त सहकारी प्राधिकरणको स्थापना र पीडित पक्षसँग भएका सम्झौता कार्यान्वयन गरी पीडितलाई न्याय दिन बैठकले माग गरेको छ।  

झाले भने‚ ‘उच्च ओहदामा रहेकाहरूको भ्रष्टाचार छानबिनका लागि सर्वोच्च अदालतका पूर्वन्यायाधीशको अध्यक्षतामा निष्पक्ष, स्वतन्त्र एवं अधिकार सम्पन्न जाँचबुझ आयोग गठन गर्दै उच्च ओहदामा रहेका सबैको सम्पत्ति छानबिन, सार्वजनिकीकरण एवं दोषीमाथि कारबाही गर्नुपर्ने माग गर्छौँ।’

पत्रकार सम्मेलनमा पार्टीका नेताहरूले स्थानीय तह उपनिर्वाचनमा पार्टीका उम्मेदवारहरूलाई मनोनयन दर्ता गराउने काममा पनि सत्तारुढ दलहरूले नदिएको आरोप लगाएका छन्।

• संसद विघटन